- La Oca Loca - https://www.revistalaocaloca.com -
Trobando faina
Posted By Víctor Guiu On 09/05/2014 @ 09:00 In Apuntes,Artes y letras | No Comments
En os días en os que mos des-comunican os meyos de des-comunicazión que l´ature puya e puya sin que os retalles faigan atra cosa que aduyar a ista puyata, me´n boi de casa de maitín ta beyer si trobo faina.
Fa uns días una siñoreta (d´ixas estiratas) me deziba que bueno, que n´ir á trobar faina a lo menos no cuesta mica. Güei m´alcordaba yo d´as suyas parolas, de su mai, de su pai e de toz os suyos muertos.
De primeras pagaba en a Caxa (una d´ixas que ya no´n sé como se clama) güeito euros pa dreitos d´esámen. Dimpués plegaba á ra copistería pa fer fotocopias. Dezisais euros, con o encuadernato incluyito e una ripa de copias de tetulos, cursez de totas trazas que imachinez, antimás de bels poemas pa nimbiar-los-ne á uno d´ixos concursos.
En transporte e en o mio auto me suposo que son a lo menos zinco euros més. Sumamos tamién diez euros en correus e dos més pa aparcar. A la fin, trentaitres euros solo que una maitin. A ras semanas me´n iba a Uesca a fer o esámen. Cien opositors pa una plaza temporal. Toz sapeban qui yera o elexito. Atra perda de tiempo e diners.
A zaguera semana, atro nimbio a una Fundazión con binclo politico. Suposábanos que yera escoscau o prozeso. ¡Miau!. Toz sapeban qui yera o elexito. Atro día charramos d´ixas Fundazions, d´ixos prozesos e d´ixa mierda de sistema que amparamos per estar callaus.
A begata benién que me i trobe con ixa siñoreta (d´ixas estiratas), no li diziré cosa. Millor li nimbiaré una carta dedicata, con poema dentro…e un poquet de carbunco en polbo.
Article printed from La Oca Loca: https://www.revistalaocaloca.com
URL to article: https://www.revistalaocaloca.com/2014/05/trobando-faina/
Click here to print.
Copyright © 2011 Revista La Oca Loca. Todos los derechos reservados.